jueves, 30 de junio de 2016

Poemes pa nueches de media lluna


Moisés Cima
Premiu «Fernán-Coronas» 2015
Pontiga, 23
ISBN: 978-84-8053-844-2
14 x 21 cm || 72 páxs. || PVP: 10

«Moisés Cima Fernández (Uvieo, 1983), más conocíu como Moiso nos ámbitos nos que mueve los pies acera alantre y nos sitios onde compra’l pan, ye’l peluche más amorosu que la poesía postmoderna cosió. Esti llibru que tienes nes manes ye’l so primer pasu d’éxitu na poesía impresa en papel, con tapa blanda y con diseñu molón na portada, anque yá lleva dellos años publicando la lliteratura que se-y vien a la boca nel blogue El paporrubio, onde asoleya escritos poéticos y prosaicos n’asturianu, gallego-asturianu y casteyanu. Poemes pa nueches de media lluna (Premiu "Fernán-Coronas" de Poesía 2015) preséntase agora n’asturianu, anque la mayoría de los poemes fueron escritos orixinalmente nel gallego-asturianu tan personalísimu qu’él tien.
Pa entender la poesía que nos regala Moiso hai que lleela despacio, si pue ser, con un cortáu medianu y, si tovía pue ser más, combinando estes dos coses con una conversación col autor, que nun ye difícil de consiguir: "Moiso, toi lleendo’l to primer llibru, ¿tomamos dalgo y comentámoslu?". "Val, nenón/nenúa", dirá él, seguramente, "si lleísti’l llibru, yá nos veremos, pero si non, que nun sía por falta mía".
Lliteratura, esperiencies y "moisismu" xúntense nesti llibru. Vamos dexanos contaxar pol ritmu de vida del autor: parái los relós y lleéi». Miguel Rodríguez Monteavaro

Esconderite


Berto García
Pontiga, 22
ISBN: 978-84-8053-843-5
14 x 21 cm || 68 páxs. || PVP: 9

Esti llibru, que pue ser tamién un Esconderite, recueye venticuatro poemes (tantos como hores tien una xornada). El tiempu que pasamos, día tres día, a la gueta d’un llugar, un momentu, una sensación, onde tar seguros y tranquilos. Pue ser nel silenciu o nel estrueldu; nel día o na nueche; na memoria o nel escaezu; na entruga o na repuesta; na verdá o na mentira.
Un Esconderite (sida, muria o abellugu), entendíu esti siempre como sistema de defensa, ye un llugar pa dexar, a un llau, la vida que te duel; un momentu onde tea seguru y nun t’alcuentren; una postura de la que nun te quies mover. Como nel xuegu de los nenos: cuntar, escondese y esperar a que t’alcuentren.
Esconderite ye una cenciella, pero al empar, fonda reflexón alrodiu d’eses sides, muries, mieos, trampes que nos ponemos pa nun almitir la realidá que, testerona, nos espera fuera. Pero estes llendes, autoimpuestes, nun son eternes, nun duren siempre. Tienen fecha de caducidá. Porque un día la vida nos topa, llega d’esmenu, manca y nos arrodia. Desixéndonos aición y repuestes pa salir d’esi abellugu. Pidiéndonos vivir.
Berto García ñaz en Les Vegues (Corvera), en 1975. Esti ye’l sestu poemariu que da a imprenta l’autor, depués de cuatro editaos nesta mesma editorial: Ensin otra sida (2005), Treslallende (2007), escritu a medies con Carlos Suari, Manual contra’l vacíu (2008), Premiu Fernán-Coronas 2007 y Inercia (2013); y de Cuando’l mundu debala (Academia de la Llingua Asturiana, 2011), Premiu Llorienzu Novo Mier 2009.

Lliteratura interna


Solinca Turbón Cuesta
Premiu «Nené Losada Rico» 2014
Pontiga, 21
ISBN: 978-84-8053-842-8
14 x 21 cm || 76 páxs. || PVP: 10

Lliteratura interna ye'l primer poemariu d'una poeta nueva que trai savia fresco a la lliteratura asturiana.
Variáu y distintu en temática y en formes (del poema curtiu y concisu al más llargu y narrativu) percuérrelu, por embargu, un filu que-y da unidá y un ciertu «aire de familia» con otros poemes d'autores de la Segunda Xeneración del Surdimientu, sobre manera nel usu de lo rural como «topoi» bien afechiscu pa falar de lo universal. Ye esta una poesía de calidá, novedosa, ambiciosa nes formes y clara na so sensibilidá, ensin mieu a afrontar l'usu de métriques tradicionales.
Solinca Turbón Cuesta (La Felguera –Llangréu–, 1981), llicenciada en Sicoloxía y máster en Xestión Integrada de la Empresa, foi a ganar con esta obra'l Certame de Poesía «Nené Losada Rico» na convocatoria del 2014, y con ella vien a anovar les paraes agües de la poesía asturiana, en xeneral, y la escrita por muyeres, en particular.