jueves, 15 de diciembre de 2016

Manuel Menéndez y l'Asturies occidental


Varios
Anexos de la Revista de Filoloxía Asturiana
ISBN: 978-84-8053-829-9
15,5 x 21,5 cm || 184 páxs. || PVP: 20

N’avientu del añu 2012 cumplióse’l cincuentenu cabudañu del profesor Manuel Menéndez García (1909-1962), figura de referencia na Universidá d’Uviéu nos estudios dialectolóxicos y de cultura popular asturiana (etnografía, lliteratura oral tradicional, arqueoloxía). Con motivu de la efeméride, hebo delles iniciatives dirixíes a l’acordanza y recuperación de la so figura y legáu. El Real Institutu d’Estudios Asturianos (RIDEA) reeditó la so obra más notable, la monografía dialectolóxica de dos volúmenes dedicada a El Cuartu los Val.les (Tinéu), y amás amestó un tercer volume de materiales inéditos, iguáu por Ramón d’Andrés y Taresa Lorences. Pela so parte, la Universidá d’Uviéu asoleyó más materiales inéditos de Manuel Menéndez recoyíos en Bermiego (Quirós) y editaos por Xulio Viejo. Tales xeres fueron posibles gracies a la xenerosidá de los descendientes del filólogu homenaxáu, Arturo y Marta Menéndez Abella y Andrés Menéndez Blanco, que punxeron en manes de los investigadores los materiales inéditos.
N’ochobre del 2014, el Seminariu de Filoloxía Asturiana de la Universidá d’Uviéu y el Real Institutu d’Estudios Asturianos entamaron dos xornaes d’estudiu baxo’l títulu de «Manuel Menéndez y l’Asturies occidental mediu sieglu depués», con aportaciones d’especialistes en dialectoloxía, arqueoloxía, historia medieval y antropoloxía. Celebráronse actos na Facultá de Filosofía y Lletres, nel RIDEA y nes Cases de la Cultura de Navelgas (Tinéu) y Grau.
Como culminación de toes estes conmemoraciones, el Seminariu de Filoloxía Asturiana ofrez esti volume especial de la Revista de Filoloxía Asturiana (na colección «Anexos»), onde s’atropa una serie de trabayos que, dende les especialidaes mentaes, inspírense y apóyense nel legáu intelectual que Manuel Menéndez dexó pa la comunidá d’investigadores asturianos.

No hay comentarios:

Publicar un comentario en la entrada