jueves, 29 de agosto de 2013

Naufraxos


Ricardo Candás
Premiu «Nené Losada Rico» 2011
Pontiga, 11
ISBN: 978-84-8053-685-1
14 x 21 cm || 58 páxs. || PVP: 9 €

Con Naufraxos, poemariu d’aire gris y biltu viviegu, ganó Ricardo Candás (Xixón, 1977) el premiu Nené Losada Rico que concede l’Asociación de Mujeres Valdés Siglo XXI, na convocatoria del añu 2011.
Si, na tradición lliteraria, la vida ye una barca al debalu pela mar, el naufraxu ye la metáfora que fala de la derrota (o les derrotes) que la vida va sumando pasín a pasu: «Naufraxos toos, / entellunu / de la memoria, / les mios vides paraleles».
Narrador y poeta, Ricardo Candás tien publicaos los poemarios Quiciás seya payares (2006), Los díes pensatibles (2012) y el volume de cuentos Les últimes pallabres (2010).

jueves, 22 de agosto de 2013

Presentación «Al xeito del tambor»


Martes 27 d’agosto del 2013 ás 19:30 horas presentación del llibro Al xeito del tambor d’Ana Vega. 
Participan amás del autora:
Cecilia Pérez Sánchez, alcaldesa del Conceyo del Franco

M.ª Ángeles Iglesias Baniela, conceyala de Cultura 
Esther Prieto, d’Ediciones Trabe

Ha a proyectarse el curtiometraxe Eu soi quen fun, de Melania Fraga


Auditorio Municipal As Quintas, A Caridá [El Franco]

Na cuerda floxa


Antón García
Batura, 21
ISBN: 978-84-8053-706-3
14 x 21,5 cm || 284 páxs. || PVP: 12 €

Anque na nota qu’abre esti volume Antón García se defina a él mesmu como un llector eclécticu que pon per escrito les sos impresiones, Na cuerda floxa ye un repasu críticu de les publicaciones más destacaes de los postreros tres o cuatro años. Narrativa y ensayu, poesía y teatru, música y revistes, a tolos xéneros empresta atención, principalmente a lo editao n’asturianu, anque de xemes en cuando s’ocupe de llibros n’otres llingües. Al atropar nesta edición les reseñes breves y d’urxencia publicaes na prensa diaria o en revistes, rescatamos un apasionáu averamientu a la cultura asturiana d’estos últimos años por quien ye, a la vez, xuez y parte del procesu de recuperación cultural d’Asturies.

Antón García (Tuña, 1960) ye llicenciáu en Lliteratura Española pela Universidá d’Uviéu. Amás de poeta (La mirada aliella), narrador (Díes de muncho, Xente tan cerca) y traductor (Andrade, Lispector, Cunqueiro...), edita y dirixe la revista asturiana de cultura Campo de los Patos. Tien preparao la edición de la obra de González-Villar, Acebal, Fernán-Coronas, Ángeles López Cuesta, los narradores asturianos... En 1994 publicó Lliteratura asturiana nel tiempu, primer manual de les nueses lletres. Los artículos qu’escribió sobre lliteratura asturiana a lo llargo de trés décades recoyólos en sendos tomos (2007 y 2011) baxo'l títulu Xeneraciones y dexeneraciones.

Todos os tristes de mayo


Miguel Rodríguez Monteavaro
Pontiga, 12
ISBN: 978-84-8053-700-1
14 x 21 cm || 98 páxs. || PVP: 10 €

Se Miguel Rodríguez Monteavaro (Bual, 1990) chamóu el atención con Trenta razóis pra nun medrar polla precocidá cua que s'atrevía a sumar al mundo a súa voz poética (namáis tía vente anos condo se publicóu), col aparición de Todos os tristes de mayo (Premiu Fernán-Coronas 2012 na súa versión en asturiano) destaca polla evolución estraordinaria da súa llírica. Sin deixar d'apuntar de xeito mui residual dellas coordenadas básicas da súa obra anterior, como a presencia da naturaleza ou a visión circular del tempo, Miguel Rodríguez Monteavaro quer máis avanzar nel sou camín llírico y zampar úa berrida colectiva y xeneracional de reigaño urbano ben marcao, unde se deixa ver a violencia da posmodernidá, a incomunicación del ser humano, a sordidez da noite, a dificultá de vivir ou a crueldá da divinidá. Aborda un imaxinario pop con actitú punk y, a pesar d'identificar felicidá con falacia y tristeza con realidá, nun para de lluitar por tocar a lluz y cola entre os sous versos sacudiyóis de sensibilidá.

Con un evidente dominio llingüístico, el bualés amostra úa auténtica obsesión polla plasticidá dos vocablos y úa gran audacia cos xogos de palabras. El hábil uso del encabalgamento consigue un ritmo entecortao qu’asomeña á forma en que recibimos os bloques d'información na sociedá contemporánea. A través d'úas imaxes mui efectivas que siguen úa llixeira corrente irracional, el poeta asimila y fagocita a súa realidá llingüística (y, pollo tanto, vital) y propón como resposta al cansancio vital a inacción (que sustituye al arrepentimento). Peró nun s'engañen, a pesar de todo, Miguel nunca vei deixar d'andar polla vida xiprando.

lunes, 12 de agosto de 2013

Pasiando per Xixón


Esther Prieto y Samuel Castro
Pasiando, 1
ISBN: 978-84-8053-697-4
21,5 x 30,5 || 44 páxs. || PVP: 10 €

Perguapa guía de Xixón pa la xente más menudo. Con ilustraciones a tou color y escrita en 4 llingües (asturianu, castellanu, inglés y francés) avéranos a los rincones más interesantes de la villa de Xovellanos. Inclúi direcciones, teléfonos y códigos QR pa la xente que quede con ganas de saber un pocoñín más.