lunes, 29 de abril de 2013

Inauguración de la esposición «Trabe, historia d'una editorial asturiana»

Güei, día llunes 29 d'abril a les 18:00 hores inaugúrase na casona del Bravial (travesía de Goya, Blimea –Samartín del Rei Aurelio–) la esposición «Trabe, historia d’una editorial asturiana», que va tar abierta al públicu hasta’l día vienres 31 de mayu.

Nella faise un repasu, per un llau de los 21 años de vida d’esta editorial al través de llibros, prebes d’imprenta, cuadros etc., y per otru una una revisión del procesu técnicu de producción.

Si quies visitala, va tar abierta de llunes a vienres n’horariu de mañana de 9:00 a 13:00 hores.

martes, 23 de abril de 2013

Al xeito del tambor

Ana Vega
Pontiga, 9
ISBN: 978-84-8053-682-0
14 x 21 cm || 72 páxs. || PVP: 9 €

Violín, gaita, tambor: os sois da tierra d’úa, a que nun se quer perder y guarda pra sempre el acordanza da nena que foi y medróu cuas notas sentimentales d’esos instrumentos. Al xeito del tambor é un poemario –el primeiro y en gallego-asturiano– d’úa autora xa conocida polos sous escritos en castellano, distintos y diversos. 
Apegaos á terra, á infancia, os poemas d’Ana Vega falan d’exilio y de reconocemento, d’amor por úa xente y úa terra que guarda con ella a música que la esplica en versos con clara vocación de permanencia.
Ana Vega (Uviéu, 1977) ten publicaos dalgús llibros en castellano: El cuaderno griego (2008), Breve testimonio de una mirada (2009), Realidad paralela (2010) y La edad de los lagartos (2011). Colaboradora en periódicos (La Nueva España, Oviedo Diario) y revistas (Pretexto, Fábula, Clarín...), parte da súa creación poética ta recoyida en obras colectivas y antoloxías: La palabra compartida (1997), Ladran los perros (2007), A quien conmigo va (2007), La manera de recogerse el pelo (2010)...

Los poemes del oriental

José Ángel Gayol
Premiu «Elvira Castañón» 2011
Pontiga, 8
ISBN: 978-84-8053-683-7
14 x 21 cm || 52 páxs. || PVP: 9 €

Los poemes del oriental, pequeñu poemariu col que José Ángel Gayol ganó’l Premiu de Poesía «Elvira Castañón» nel añu 2011, ye un conxuntu de poemes nos que’l tiempu y la señaldá apoderen unos versos curtios pero intensos. El futuru, esi tiempo que nunca nun llega y siempres ta ehí, y el pasáu confronten en «L’home oriental», dexando «un soníu qu’esbuiza / pelos túneles, / dexando / un badagüeyu misteriosu / de sieglos y arumes».
José Ángel Gayol (Mieres del Camín, 1977) ye llicenciáu en Derechu pola Universidá d’Uviéu y n’Antropoloxía Social y Cultural pola UNED.
Escritor y críticu lliterariu n’asturianu y castellanu, tien yá publicaes delles obres de poesía (Con el velo de una sonrisa –2006–, col que ganó en 2005 el Premiu «Asturias Joven» de Poesía), prosa (Argonautes, 2007) y teatrales (Ensin noticies del fin del mundo, 2011, Premiu «Asturias Joven» de Textos Teatrales 2010).
Ganador en 2011 del Premiu de Poesía «Fernán-Coronas» con Los suaños y los díes, tien pa publicar El llibru de les coses misterioses, poemariu con que se fexo col Premiu de Poesía «Xuan María Acebal» nel añu 2012.
Collaborador habitual nel diariu La Nueva España y en revistes lliteraries (Clarín, Reloj de Arena o Paralelo Sur), ye una de les voces más personales del nuevu panorama lliterariu asturianu.


Inercia

Berto García
Pontiga, 7
ISBN: 978-84-8053-681-3
14 x 21 cm || 96 páxs. || PVP: 10 €

Inercia ye la falta de fuerza que puede modificar un movimientu que nun escoyimos y nel que nun nos afayamos. Ye la rutina qu’afuega, cansina como’l pingar d’un grifu dau de sí y que, por aciu de la costume, mortifica y taladra’l cerebru con un estruendu ensordecedor. Inercia ye una duermevela costante qu’atrofia la musculatura de les emociones pesie al impulsu vital de romper con ella. La inercia incapacita, cierto ye. Pero, nesi sinsentíu del que nun somos responsables y que convida a la victimización conformista, davezu la inercia tamién puede ser l’hábitu conservador de delles sensaciones y dalgunos actos que nacen de la necesidá, y que nos rescaten d’esa otra –la del mundu esterior– que nos oprime. Asina la de Berto García (Les Vegues, 1975), que se traduz na busca incansable de les palabres esactes coles que descifrar lo muncho qu’esconocemos y que, más allá del llinguaxe, se nos escapa.
Consecuente cola so obra poética anterior, y nel lóxicu procesu de maduración de la voz, ufierta nesti poemariu una colección d’impresiones que, a la manera de cencielles notes, desvisten la escena d’accesorios y decoraos pa quedar a soles cola emoción más pura. Reflexona, tarrez, deféndese y pon en marcha’l motor d’escape de la desidia, ensin antroxar la vida con razones engañoses pero ensin dexase atrapar tampoco pola desesperación de sintise un simple títere en manes d’una trama sobre la que non siempre se puede actuar. Esta ye, al final, la busca de coordenaes pa salir «d’esi llaberintu / que crea la memoria / dende’l silenciu». Múltiples formes d’esplicar la inercia.
Vanessa Gutiérrez

Berto García ñaz en Les Vegues (Corvera), en 1975. Esti ye’l quintu poemariu que da a imprenta l’autor, depués de trés editaos nesta mesma editorial: Ensin otra sida (2005), Treslallende (2007), escritu a medies con Carlos Suari, y Manual contra’l vacíu (2008), Premiu Fernán-Coronas 2007, y de Cuando’l mundu debala (Academia de la Llingua Asturiana, 2011), Premiu Llorienzu Novo Mier 2009.
Tien amás bien d’obra espardío peles revistes lliteraries del país, como El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes Pa[i]saxes y Cuando la memoria fala. Tien feches les tornes, na estaya de la lliteratura infantil, pa la editorial Cumio, de los llibros Florenta, la gata poeta y Les fábules de Leonardo da Vinci. L’autor ye mayestru d’Educación Infantil, amás d’espertu en Llingua Asturiana. 

La botella de Xixón

Inaciu Hevia Llavona
Premiu «Fierro Botas» d'Ensayu 2012
Batura, 19
ISBN: 978-84-8053-678-3
14 x 21,5 cm || 116 páxs. || PVP: 9 €

Dende antiguo sabemos que la xente d’Asturies bebe sidra. Yá Plino’l Vieyu falaba de la esistencia del vidriu na Antigüedá. Entrambos los dos fechos xúntense y formen una de les peculiaridaes más característiques de la cultura de la sidra asturiano: l’escanciáu.
Pero, ¿dende cuándo y cómo la sidra asturiano s’embotella: cómo nació y se desendolcó la botella de sidra del país, que por fabricase demientres tiempu na ciudá más grande d’Asturies llegó a nomase botella de Xixón? La botella de Xixón. Oríxenes y desendolcu hestóricu de la botella de sidra d’Asturies fai un percorríu bien prestosu pela hestoria d’esta botella emblemática y de la so materia, el vidriu, dende los secretos meyor guardaos de los vidrieros de la islla de Murano fasta los modernos recipientes fabricaos yá fuera d’Asturies, ensin escaecer el compañeru insepartable de la botella: el vasu sidra.
Inaciu Hevia Llavona (Xixón 1965) ye etnógrafu y collaborador d’estremaes publicaciones especializaes, onde tien asoleyaos dellos artículos, principalmente de tema hestóricu ya etnográficu dende va más de 15 años.
Amás de dellos trabayos toponímicos editaos pola Academia de la Llingua Asturiana, l’estudiu de la cultura tradicional asturiana al traviés, sobre too, del trabayu de campu que vien desendolcando per tola nuesa xeografía, dio tamién nel asoleyamientu de los llibros Les paneres de Maliayo (2004), Arte popular asturiano (2005), Sidra y llagares tradicionales asturianos (2006) y La sidra y los lagares tradicionales en tierras de Maliayo (2011). 
Escritor, tanto n’asturianu como en castellanu, ye autor tamién de delles entraes de la Enciclopedia de Cabranes, coordinada por José Antonio Mases y editada baxo’l sofitu del ayuntamientu de Cabranes.

lunes, 22 de abril de 2013

Trabe, historia d'una editorial asturiana


Dende'l 29 d'abril al 31 de mayu, con motivu de la Selmana de les lletres Asturianes 2013 en Samartín del Rei Aurelio, la Casona del Bravial de Blimea acueye una esposición sobre Trabe.