lunes, 30 de julio de 2012

Premiu «Montesín» de Lliteratura Xuvenil 2012


• PA OBRES DE LLITERATURA XUVENIL EN LLINGUA ASTURIANA [NOVELES, RECOPILACIONES DE CUENTOS O OBRES DE TEATRU]
• 1.500 EUROS
• HASTA’L 31 D’AGOSTU DE 2012


Ediciones Trabe convoca’l Premiu «Montesín» de Lliteratura Xuvenil 2012, que va rixise poles siguientes BASES:
Primera: puen participar toles persones interesaes, soles o en grupu, ensin límite d’edá, con obres de lliteratura xuvenil en llingua asturiana, yá seyan noveles, recopilaciones de cuentos, poemes o obres de teatru.
Segunda: los trabayos presentaos nun tendrán menos de trenta páxines DIN A-4 o foliu mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos.
Tercera: el premiu tien una dotación de 1.500 euros en conceptu de drechos d’autor y la so publicación dientro de la colección Pesllera d’esta editorial. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.
Cuarta: les obres han mandase, per corréu postal o en mano, en cuatro copies a Ediciones Trabe, S. L., U. c/ Foncalada, 10 2u A, 33002 d’Uviéu, enantes de les 24 hores del día 31 d’agostu de 2012, faciendo constar la siguiente lleenda: Premiu «MONTESÍN» de Lliteratura Xuvenil 2012. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.
Quinta: el xuráu tará formáu por persones relacionaes col ámbitu de la lliteratura xuvenil asturiana. Como secretariu o secretaria, con voz pero ensin votu, actuará un representante d’Ediciones Trabe.
Sexta: al fallu del xuráu nun se pue retrucar. Faráse públicu enantes del día 20 d’ochobre de 2012. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.
Sétima: los trabayos que nun se premien volveránse a los autores, en pidiéndolos estos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.
Octava: presentase al premiu supón tar d’alcuerdu coles bases. Les cuestiones que se plan­texen y que nun tuvieren establecíes nestes bases podrá resolveles el xuráu.

jueves, 12 de julio de 2012

Refraneru asturianu



Xuan Xosé Sánchez Vicente
Xente de casa, 10
ISBN: 978-84-8053-661-5
14 x 21 cm ||258 páxs. || PVP: 12 €

Esta segunda edición, ampliada y revisada, del Refraneru asturianu ye la más completa recopilación de refranes d’Asturies que se pue alcontrar.
El llibru ta dividíu en tres partes bien estremaes: una teórica, na que los autores espliquen con brevedá y aciertu qué entendemos por refraneru «asturianu», les distintes clases y formes sintáctiques que presenta, así como dalgunes notes característiques de la paremioloxía asturiana referida al cuerpu, la enfermedá y l’alimentación. Al tiempu, los autores faen una reflexón sobre’l camín qu’han triar los futuros estudios sobre’l refraneru asturianu, al empar qu’estudian la bibliografía yá existente.
Sigue depués la segunda parte, el refraneru propiamente dichu, que recueye más de 4.000 refranes clasificaos según el tema al que faen referencia. A lo último pieslla’l llibru un mui útil índiz temáticu, por palabres qu’apaecen usaes nos refranes, que facilita la busca d’un refrán determináu.
Ye esta una publicación pa saborgar, pa deprender y, al empar, pa evitar el desaniciu d’una parte importante de la cultura asturiana. El refraneru reflexa meyor que nada la forma de ser, de ver y de sentir la vida d’esti pueblu.

Ciencia y llingua


Fermo Fernández Suáres, Arturo Morales Muñiz, Eufrasia Roselló Izquierdo, M.ª del Carmen Toro Gonzálvez
Batura, 16
ISBN: 978-84-8053-646-2
14 x 21,5 cm ||528 páxs. || PVP: 15 €

Ciencia, porque ye ún de los temes más maraviyosos de los que se pue falar en cualquier llingua.
Llingua, qu’hai querer y curiar. Y eso namái ye posible usándola en toles estayes, inclusive, claro, na Ciencia.
Ciencia y llingua: un averamientu al léxicu científicu del dalla o quiciabes una disculpa. Porque enrestrando llagostes con positrones, bacteries con marraxos, los autores van falándonos de ciencies demientres, una y otra vuelta, cayen na tentación de llevanos a lo que más-yos presta: Asturies y la Naturaleza. Un binomiu indixebrable.
Fermo Fernández Suárez (Lluanco, 1958) ye llicenciáu en Ciencies Químiques pola Universidá d’Uviéu. Tres unos años como investigador nel campu los polímeros, trabayó de profesor en colexos d’Oxford y Madrid; n’actualidá failo nel colexu Quercus de Boadilla del Monte.
Arturo Morales Muñiz, (Xixón, 1952) ye llicenciáu y doctor en Bioloxía pola Universidá Complutense, caderalgu de Zooloxía y direutor del Llaboratoriu d’Arqueozooloxía nel Departamentu de Bioloxía de la Universidá Autónoma de Madrid. Investigador de les faunes de xacimientos arqueolóxicos, en 1982 fundó la revista Archaeofauna, que dirixe desde entós.
Eufrasia Roselló Izquierdo (Madrid, 1957) ye llicenciada y doctora en Bioloxía pola Universidá Autónoma de Madrid y profesora titular de Zooloxía nel Departamentu de Bioloxía d’esa mesma Universidá. Investigadora nel campu de la pesca marino n’Europa, ye cofundadora y editora-xefe de la revista Archaeofauna.
M.ª del Carmen Toro Gonzálvez (Jaca, 1957) ye llicenciada en Bioloxía pola Universidá Autónoma de Madrid. Profesora dende l’añu 1982, agora dirixe’l Departamentu de Ciencies del colexu Quercus de Boadilla del Monte, Madrid.

A la mar


Xuacu Álvarez Suárez (fotos)
I Recital de poesía de la mar Peña Lladrona 2010
ISBN: 978-84-8053-654-7
24 x 17 cm ||84 páxs. || PVP: 10 €


El día 10 de xunetu, nel camping Las Gaviotas de Santa María del Mar / El Puertu (Castrillón) celebróse’l I Recital de Poesía de la Mar «Peña Lladrona», entamáu pola asociación que lleva’l nome d’esta peña castrillonense. Esti llibru ye’l resultáu de xunir testos y fotografíes marines (obra de Xuacu Álvarez Suárez), nuna amestadura bien interesante y guapa. Diez son los autores que recitaron ellí los sos versos, cuando n’asturianu cuando en gallego-asturianu y siempre acompañaos pola música interpretada por Celia González y Hervé Perechón: Xosé Ramón Martín Ardines, Sabela Fernández, Humberto Gonzali, Iván Iglesias, Ignaciu Llope, Ánxel Nava, Esther Prieto y Javier Cayado Valdés.

viernes, 6 de julio de 2012

Presentación de los Premios Asturias Joven 2011

12 de julio de 2012 a las 19:30 horas, en la Biblioteca de Asturias «Ramón Pérez de Ayala» (Plaza Daoiz y Velarde s/n, Oviedo), presentación de las publicaciones ganadoras de los Premios Asturias Joven de Poesía, Narrativa y Textos Teatrales 2011.