viernes, 27 de enero de 2012

Microrrellatos Trabe

Ediciones Trabe abre la maratón de microrrellatos al traviés de facebook o del blogue (http://edicionestrabe.blogspot.com/). Los escritos, sobre la crisis económica qu’apodera’l mundu d’anguaño y les posibles maneres de dexala p’atrás, nun han tener más de 250 caracteres y han dir firmaos col nome y apellíos de quien escribe y acompañaos de un corréu electrónicu y un númberu de teléfonu onde porder contactar.

El plazu p’apurrir de manera telemática (en facebook o nel blogue de Trabe) los orixinales entama esta mesma tarde (27-1-2012) y va acabar a les 24:00 hores del día 29 de febreru de 2012.

Ediciones Trabe acuta’l derechu de seleccionar los relatos que más-y presten y editar con ellos un llibru comunal y plural, en formatu dixital, que va quedar colgáu na so páxina web.

Asina mesmo, Ediciones Trabe acuta’l derechu a decidir el PVP del ebook, xenerador de derechos d’autoría.

Participar na maratón quier dicir qu’hai conformidá coles bases de la mesma.

martes, 24 de enero de 2012

Ediciones Trabe entra nel mundu dixital


Xúbite al mundu del llibru electrónicu con Ediciones Trabe.
Ufiertámoste cuatro llibros de baldre. Descárgalos en www.trabe.org y disfrútalos nel to llector preferíu (Ipad, Iphone, ereader...).

lunes, 16 de enero de 2012

Revista de Filoloxía Asturiana 9-10

Varios autores
Revista de Filoloxía Asturiana, 9-10
ISSN: 1578-9853 09
15,5 x 21,5 cm
|| 274 páxs. || PVP: 22 €

Doble númberu correspondiente a los años 2009 y 2010. Recueye estudios distintos («El Vocabulario asturiano y castellano, coleccionado de la viva voz del pueblo: breve estudio y edición», de Fco. Gago Jover; «Léxico galego-asturiano núas Lecciones de agricultura de 1818», de Xosé M. Suárez; «Vocabulario de eusquerismos en las gergas gremiales de Asturias y del Noroeste de la Península (1)», de Ramón d’Andrés Díaz; «Ámbito del predicado y posición de los pronomes átonos en asturiano», de Taresa Fdez. Lorences; «La dialectometría y su aplicación en el estudio de las variedades del catalán», de María Pilar Perea; «Ily/*Nur y Cerecotes. Dos notas críticas sobre onomástica y reconstrucción de prelenguas», d’Eduardo Blasco Ferrer; «Unde habita la melancolía. Miradas sobre el romance eonaviego», de Raúl González González. Complétase’l volume con delles notes, reseñes, una crónica y una necrolóxica d’Emilio Barriuso.

Descarga l'índiz en formatu pdf.

La ñeve del cuquiellu

Xabiero Cayarga
Premiu «Teodoro Cuesta» 2010
Pontiga, 2
ISBN: 978-84-8053-616-5
14 x 21 cm
|| 72 páxs. || PVP: 7 €

Xabiero Cayarga, quiciabes el más centro-européu de los poetes asturianos, regálanos esta nueva entrega poética, La ñeve del cuquiellu, cola que foi a algamar per segunda vez, el Premiu «Teodoro Cuesta» na convocatoria del 2010.

Con poemes narrativos y esenciales, l’autor va creando un mundu poéticu, al empar qu’éticu y moral, onde la cenciellez y pulcritú llingüístiques, la maestría de componer aseñorien unos versos escritos dende la sinceridá y la calma que’l posu los años y la esperiencia van dexando.

Xabiero Cayarga (Cangues d’Onís, 1968) ye una de les voces meyores con que cuenta la lliteratura asturiana. Amás del so reconocíu llabor como poeta (El deliriu d’esclavu, Pequeña Europa y Les llingües de la Hydra) y narrador (cuentos: Les gatileres del cielu, Güelgues sobre’l llagu, A flor de piel; noveles: Trastes de bufanda y El Sol Negru de Wewelsburg), nos caberos años vien desenrollando un importante xera traductora, apurriendo al públicu llector asturiano cuidaes traducciones de los poetes más significativos de la llingua alemana (Dellos poemes, de George Trakl y Obra lírica. Selección d’Hugo von Hofmannsthal).