viernes, 23 de diciembre de 2011

Calidoscopiu

Paula Pulgar Alves
Incla interior, 103
ISBN: 978-84-8053-622-6
13 x 20 cm || 98 páxs. || PVP: 8 €

Diecisiete son los cuentos que Paula Pulgar Alves recueye nesti segundu volume, Calidoscopiu. Con una facilidá bien grande pa narrar hestories, la crueldá d’unos personaxes n’apariencia normales señoria les ringleres d’esti llibru. Pero nun hai que s’equivocar, nestos rellatos tamién hai espaciu pa «un rispiu d’esperanza», pa dexar que’l colar del tiempu amatague’l dolor y les firíes, pa ver el mundu colos colores del calidoscopiu compráu en Portobello Road.

Paula Pular Alves (Piñera Baxo, L.l.ena) ye llicenciada en Filología Hispánica y Especialista en Filoloxía Asturiana. Trabayó dalgún tiempu nel ámbitu de la normalización llingüística. Anguaño ye profesora de Llingua Asturiana, Castellana y Lliteratura n’Educación Secundaria. Collaboradora en delles publicaciones (Comarca Caudal, La caja de Pandora...) nel añu 2008 publicó Cuentos de metru y de centímetru, la so exitosa incorporación a la narrativa asturiana. Narradorra de casta y oficiu, dedícase tamién al mundu de la lliteratura infantil, de la que tien editaos dellos cuentos (Primeres aventures de Pulgu y Yolín, 2007 o El mundu de Susana, 2008).

Mercar el llibru.

jueves, 15 de diciembre de 2011

lunes, 12 de diciembre de 2011

Palabres d'un tiempu

Pablo Rodríguez Alonso
Premiu «Nené Losada Rico» 2010
Pontiga, 6
ISBN: 978-84-8053-639-4
14 x 21 cm
|| 56 páxs. || PVP: 7 €

Segundu poemariu del autor, Palabres d’un tiempu ye una obra de madurez, de palabra pausada, pero inquietante. Abren el llibru versos precisos de quien s’enfrenta a la vida adulta consciente de que les palabres d’esti tiempu son palabres mayores, lloñe de les rises y l’esfrute de la neñez: palabres d’un tiempu «fatigáu d’esperances».

La desolación de la vida adulta, de la muerte de la madre o del amor como pasáu o como presente desgarrador, andulien los versos apotaos y firmes d’esti poemariu col que l’autor foi a facese col Premiu «Nené Losada Rico» na so convocatoria del añu 2010.

Pablo Rodríguez Alonso (Xixón, 1979) ye llicenciáu n’Historia pola Universidá d’Uviéu. Como poeta ganó en 2005 el premiu de poesía «Teodoro Cuesta» con La lluz del nordés (Ediciones Trabe, 2006). Como historiador féxose con dellos premios d’importancia, como’l V Certamen Cultural Jóvenes Artistas 2005 convocáu pol Conceyu de Cáceres col ensayu Idioma, nacionalidá y conflictu y más de recién el XII Premiu d’investigación y divulgación «Rosario de Acuña» col trabayu De totalitarios a «demócrates» (Zahorí Ediciones, 2011).

Aquella xente nunca sabía aú llevaben les carreteres xunta les que vivíen

Héctor Pérez Iglesias
Premiu «Elvira Castañón» 2010
Pontiga, 4
ISBN: 978-84-8053-618-9
14 x 21 cm
|| 68 páxs. || PVP: 7 €

Aquella xente nunca sabía aú llevaben les carreteres xunta les que vivíen
ye quiciabes el poemariu más heterodoxu, plural y diversu d’Héctor Pérez Iglesias. Dividíu en cuatro partes, «Cosmogoníes», «Nocturnos», «Estielles» y «Rumbos», aliméntase de versos llargos de reminiscencies bíbliques y poemes onde la imaxe surrealista apodera los versos. Nun falten tampoco aquellos otros más figurativos que vinieron alimentando los poemarios anteriores del autor o’l poema que bancia pa lo visual y esperimental.

Con esta obra ganó Héctor Pérez Iglesias (Arlós, Llanera 1978) el Premiu «Elvira Castañón» na convocatoria del 2010. Poeta de reconocíu prestixu y voz (voces) personalísima, tien publicaos los volúmenes Prisión de náufragu (2006), L’amarga cazumbre (2008), Como crecieres tuLo peor del bon tiempu (2010). Nel añu 2009 estrenóse publicamente nel mundu de la narrativa col volume de cuentos Desinencies.

Ensin salir de casa

Ánxel Álvarez Llano
Premiu «Fernán-Coronas» 2010
Pontiga, 3
ISBN: 978-84-8053-617-2
14 x 21 cm
|| 58 páxs. || PVP: 7 €

Ensin salir de casa ye un viaxe pel tiempu, pela memoria pero tamién pel escaezu. Un viaxe vital que va del ayeri al futuru ensin salir de casa en versos qu’abelluguen la infancia y el cariñu perdíos nun valle de nublina y cielos turbios.
Con voz posada, Ánxel Álvarez Llano contrúi un poemariu d’apariencia cenciella, con un llinguaxe pulío, onde nada falta nin ta de más nada.
Ánxel Álvarez Llano (Bo, Ayer, 1958), poeta de palabra precisa, ganó con esa obra’l Premiu «Fernán-Coronas» del añu 2010 depués d’años de silenciu creativu.
Llarga y fructífera ye la carrera lliteraria d’esti poeta de mirada tranquila y al empar aliella a les coses del mundu: tres de los volúmenes consecutivos Les agües muertes (1994), Vieyos fuebos, fresques cenices (1995) y Güéspede del silenciu (1996) habíen de pasar años hasta qu’apaeciere Na mesma piedra (2001). Güei apaga la sede de quien lu sigue con esti poemariu redondu, trabayáu y sinceru.

Mercar el llibru

jueves, 1 de diciembre de 2011

Xulio Arbesú, Premiu de Narraciones Trabe 2011

Xulio Arbesú resultó ganador del Premiu de Narraciones Trabe 2011 cola novela titulada Eternu negociu.
El xuráu, formáu por M.ª Antonia Pedregal Montés, Antón García, Inaciu Iglesias y Esther Prieto, destaca nella l’espléndidu trazu de los personaxes nuna historia divertida y realista, escrita nun asturianu puío, áxil y puro.