martes, 30 de agosto de 2011

PRESENTACIONES DE LLIBROS D’EDICIONES TRABE NA ARRIBADA (VAGAMAR LLITERARIA) DE XIXÓN


XUEVES 15
Patiu, Centru de Cultura Antiguu Institutu
17,00: ¡Qué te preste! (monólogos) de Cristina Muñiz Martín

18,00: El Norte. Cuentos 1976-2010 de Vicente García Oliva

19,00: Azurriángamelamelongana de Xuan Xosé Sánchez Vicente


VIENRES 16
Patiu, Centru de Cultura Antiguu Institutu
17,00: Asina somos Nós de Miguel Rojo
18,00: La muerte amiya de nueche de Xuan Xosé Sánchez Vicente

20,00: Diariu d’un viaxe d’Adolfo Camilo Díaz

miércoles, 24 de agosto de 2011

Alborada. Métodu de gaita asturiana

Flavio R. Benito
ISBN: 978-84-8053-626-4
21 x 29,7 cm
|| 194 páxs. || PVP: 12 €

Alborada presenta, secuenciáu en niveles de dificultá, material didáctico abondo pa les enseñances elementales nos conservatorios y escueles de música. Trátase d’un conxuntu de pieces nes qu’apaecen los xéneros más representativos de la música pa gaita n’Asturies; inclúi alboraes, pasucáis y adaptaciones del repertoriu vocal relixoso (entemedios, marches procesionales) y de baille (xotes, xiraldilles, muñeires, saltones, sones d’arriba, polkes, pasudobles, habaneres...). Músiques tradicionales esbillaes del Cancionero de Torner o d’arquivos personales del propiu autor, y trescrites a partir d’un trabayu rigurosu d’investigación etnográfica. Xunta estes melodíes conocíes, alcontramos tamién dalguna composición nueva.

Obra completa n'asturianu

Nené Losada Rico
ISBN: 978-84-8053-631-8
12 x 22 cm
|| 448 páxs. || PVP: 15 €

Esti llibru recueye tola obra poética y narrativa n’asturianu de Nené Losada Rico. Xunto a los poemes de tipu popular de Cantares valdesanos (Llibros del Pexe, 1992) que se ven ampliaos nesta edición colos 68 versos últimos del apartáu «Cantares», vienen los publicaos nos dos llibros siguientes de l’autora (Entre apigarzos, 1997 y El nome de las cousas, 2001). De Fueyes que reverdecen (Atenéu Obreru de Xixón, 2004) recoyimos namás aquellos que naquel momentu yeren iné­ditos. La parte poética d’esta obra pieslla con un puñadín (7o esactamente) de poemes inéditos.

jueves, 11 de agosto de 2011

Conferencias en Asturias

Marcela Lagarde y de los Ríos
Cuadernos Feministas/Cartafueyos Feministes, 5
ISBN: 978-84-8053-628-8
17 x 24 cm
|| 52 páxs. || PVP: 3 €

Este nuevo número de la colección Cuadernos Feministas/Cartafueyos Feministes reedita la conferencia pronunciada por Marcela Lagarde en el Aula Magna del Edificio Histórico de la Universidad de Oviedo el 12 de enero de 2006, titulada «Feminicidio».

A esta conferencia se le añade otra con el título «La persistencia de la desigualdad. Políticas, liderazgos y pactos para combatirla», pronunciada por la feminista mexicana en el Centro de Cultura Antiguo Instituto de Gijón el 30 de marzo de 2009 en el marco de los actos conmemorativos del Día Internacional de las Mujeres.

Comprar el libro.


Diariu de viaxe

Adolfo Camilo Díaz
Clásicos y contemporanios, 11
ISBN: 978-84-8053-609-7
12,5 x 19 cm
|| 210 páxs. || PVP: 6 €

Novela ganadora del premiu Xosefa Xovellanos nel añu 1995, esta obra ye un viaxe a la memoria d’una xeneración, d’una xente que siempres tuvo nel zimbru la mar L’Habana, Cuba y la so revolución. Pero nun hai que s’engañar, Diariu de viaxe nun ye una novela sobre Cuba, por más que la Revolución y L’Habana Vieya andulien ente les sos páxines, que devolen rápido. Esta novela ye un viaxe al pasáu y a la memoria, a la firida que la infancia dexó abierta en Xuan, que vuelve pa realcontrase colos muertos y colos vivos, pero sobremanera p’alcontrase a sigo mesmu.

¡Que te preste!

Cristina Muñiz Martín
Maestros del humor, 27
ISBN: 978-84-8053-630-1
12 x 20,5 cm
|| 258 páxs. || PVP: 7,50 €

Si hai una lliteratura que n’Asturies tien públicu y ye quien a amestar lo nuevo y lo vieyo, la tradición autóctona y lo llegao de fuera, esa ye la lliteratura d’humor. Hasta hai bien poco esta yera una lliteratura d’homes: hubo qu’esperar al añu 2007 con Ente muyeres p’arrexuntar un puñadín curiosu de monólogos y lliteratura humorística escrita por muyeres. Agora, una de les autores ellí incluyida, Cristina Muñiz Martín, xunta nesti volume los monólogos escritos pa echar nel programa de la TPA Al aldu, na sección titulada «La risión». Con una mirada irónica pero amable, l’autora d’estos monólogos va esgranando la vida na Asturies d’anguaño, apurriendo nueves temátiques y una visión «de muyer» a un xéneru masculín por tradición.
Cristina Muñiz Martín (Xixón, 1953) ye amás de narradora, escritora de guiones radiofónicos y amante del teatru. Tien publicaos nesta editorial dellos volúmenes de cuentos (Onde pisen poques güelles, 2005; El buscador d’hestories, 2007 y Kárias, 2008), y la novela Ventiocho díes (2008). Amás d’esto, hai poco estrenóse nel mundu de la lliteratura infantil con Dingurindaines y La pota encarnada (2010).

PROMOCIÓN «LLIBROS + MÚSICA»


Si merques llibros por venticinco o más € regalámoste dos cd's de música asturiana. Esta promoción ye válida dende'l día 15 d'agostu hasta'l 15 d'ochobre o hasta que s'escoses les esistencies. ¡¡¡Aprovecha la ocasión y faite colo meyor de la música asturiana d'anguaño!!!

Premiu Narraciones Trabe 2011


Ediciones Trabe convoca'l Premiu Narraciones Trabe 2011, que va rexise poles siguientes BASES:

Primera: puen participar toles persones interesaes, soles o en grupu, ensin límite d’edá, con obres de narrativa en llingua asturiana, yá seyan noveles, recopilaciones de cuentos o cualesquier otra forma posible de narración.

Segunda: los trabayos presentaos nun tendrán menos de sesenta páxines –DIN A-4 o foliu– mecanografiaes a doble espaciu per una sola llana (1.800 caracteres). Han ser inéditos y han tar ensin premiu n’otros concursos como conxuntu, quier dicise, puen presentase obres de les qu’apaecieren fragmentos publicaos, o recopilaciones de cuentos onde hebia dalgún editáu.

Tercera: el premiu tien una dotación de 2.000 euros en conceptu de drechos d’autor y la so publicación dientro de dalguna de les colecciones de la casa editorial. El xuráu pue partilu, conceder accésit, recomendar la publicación d’otres obres o dexalu desiertu según aconseye la calidá de los trabayos presentaos.

Cuarta: les obres han mandase, per corréu o en mano, en cinco copies a Ediciones Trabe, S. L. U., c/ Foncalada, 10 - 2u A 33002 d’Uviéu, enantes de les 24 hores del día 30 de setiembre de 2011, faciendo constar la siguiente lleenda: PREMIU DE NARRACIONES TRABE 2011. Puen presentase de dos xeitos: firmando col nome, dirección y teléfonu o baxo plica, quier dicise, figurando dientro d’un sobre zarráu los datos del autor y fuera’l títulu de la obra presentada y l’alcuñu col que se presenta, d’habelu.

Quinta: el xuráu tará formáu por persones relacionaes col ámbitu de la lliteratura asturiana. Como secretariu o secretaria, con voz pero ensin votu, actuará un representante d’Ediciones Trabe.

Sexta: al fallu del xuráu nun se pue retrucar. Fairáse públicu enantes del día 10 de payares de 2011. El xuráu queda autorizáu a abrir la plica de les obres premiaes y de les que recomiende pa publicar. Pal casu de les obres que nun reciban premiu económicu, Ediciones Trabe tien que se poner d’alcuerdu col autor o autores enantes d’entamar la so edición.

Sétima: los trabayos que nun se premien volveránse a los autores, en pidiéndolos estos, nos tres meses siguientes a que se dea conocencia del fallu. Desque pase esti plazu ensin que naide los reclame pasarán a formar parte del archivu editorial.

Octava: presentase al premiu supón tar d’alcuerdu coles bases. Les cuestiones que se plantexen y que nun tuvieren establecíes nestes bases podrá resolveles el xuráu.

Uviéu, 10 d'agostu del 2011

lunes, 1 de agosto de 2011

El Cordobeyu y otros cuentos. (Nueve cuentos alleranos)


Joaquín Fernández García
Incla Interior, 101
ISBN: 978-84-8053-625-7
13 x 20 cm
|| 162 páxs. || PVP: 9 €

El cordobeyu y otros cuentos forma parte de lo que l’autor llamó yá hai tiempu «lliteratura etnográfica de creación». Refierse con ello a la lliteratura que ta enraigonada na etnografía, la qu’a él más-y presta. Y con ello quería tamién significar que los cuentos populares, les histories que se tresmiten de manera oral, de recrealos, había que lo facer na llingua de quien los cuenta y con una ambientación etnográfica asturiana dafechu.
Tolos cuentos qu’equí apaecen tán basaos n’histories que-y contaron o que de dalguna manera vivió l’autor, ye dicir, que nun salieron de la so imaxinación, yá que formen parte del padrimoniu cultural alleranu. La manera de narralos sí que ye «creación» de so. Ello ye que nesti llibru realidá y ficción van de la mano: de xuru, la xente allerano que llea’l llibru nun va ser quien a desentrellizar lo que de ficción pueda haber nestos cuentos muncho bien ambientaos y meyor escritos, que caltienen y dan lustre a una llingua, a una cultura y a una sensibilidá: la del Altu Aller.
Joaquín Fernández García (Uviéu, 1943) ye doctor en Medicina pola Universidá d’Uviéu y médicu especialista n’Hematoloxía-Hemo-terapia y Análisis Clínicos. Amás d’obres etnográfiques y médiques, tien publicaos dellos llibros al rodiu de creencies, lleendes y mitoloxía asturianes (Coses d’osos, 1993; Maldaes de l.l.obos, 1996; Les vaques tamién piensan y sienten, 1996; Fito nel país de los gorretinos, 1994; Gene, 1998) amás d’una novela sobre la emigración a América (Siete vides, 2001).

Azurriángamelamelonga. (Segunda edición)


Xuan Xosé Sánchez Vicente
Incla Interior, 100
ISBN: 978-84-8053-613-4
13 x 20 cm
|| 196 páxs. || PVP: 9 €

Azurriángamelamelonga ye una palabra eufónica que s’usaba como señal d’arranque nun xuegu infantil: una de les persones participantes arrancaba detrás de les otres pa da-yos zurriagazos con un trapu.
Y xuegu, lliterariu nesti casu, ye esta nueva obra de Xuan Xosé Sánchez Vicente, Azurriángamelamelonga, cola que ruempe un llargu silenciu creativu n’asturianu. Xuega l’autor a reeditar una obra que ye plural, pero que tien unidá: la que-y da l’espíritu de «dar zurriagazos» metafóricos al personaxe principal de toles histories que nella se cuenten, que nun ye otru que l’espíritu o sencia mesma del ser asturianu: el cainismu.
Xuegu lliterariu ye porque tres d’una apariencia d’oralidá y popularidá escuéndese la voz de la erudición que ye, a la fin, a devolver los cuentos tradicionales al orixe: enseñances, entreteníes y amañoses, p’andar pela vida.
Xuan Xosé Sánchez Vicente (Xixón, 1949) ye una de les voces de más prestixu na lliteratura asturiana. Cofundador de Conceyu Bable y políticu activu, ye autor d’una amplia obra lliteraria qu’abarca tolos xéneros: poesía (Camín de señardaes. Antoloxía poética 1974-1979, 1980; Poemes de Xixón, 1981; De reidores costes, 1988; ...Y de llastientes picos, 1999; y As de corazon/es/y/es, 2001), narrativa (Cuentos de llingua afilada, 1984; La muerte amiya de nueche, 1984 –novela–; Lluna llena, 1990 –volume de relatos–), amás de dellos diccionarios, artículos lliterarios, estudios sobre lliteratura y obres de teatru.

El Sol Negru de Wewelsburg

Xabiero Cayarga
Incla Interior, 102
ISBN: 978-84-8053-627-1
13 x 20 cm
|| 188 páxs. || PVP: 9 €

La Obergruppenführersaal, Sala de los xenerales, del castiellu de Wewelsburg tien en suelu de mármole un mosaicu que representa un sol de doce rayos formaos poles runes SS, el Schwarze Sonne, o Sol Negru. Esti castiellu, destruyíu demientres la Guerra de los Trenta Años y vueltu a construyir, foi un centru d’importancia bien grande demientres el nacionalsocialismu: alquiláu en 1934 pol llugarteniente de Hitler, Heinrich Himmler, esti tentó de convertilu nel centru del nuevu mundu que diba xurdir en ganando’l Tercer Reich la batalla última.
El mundu de la emigración, del racismu, la xenofobia y el antisemitismu afitáu na pobreza material y mental de l’Alemaña unificada del sieglu XXI ye l’escaparate que nos presenta esta novela, al traviés de Marcial, un asturianu de la emigración, que va xuntase con un grupu de neonazis que tienen como centru base esti castiellu, al que van a recibir llecciones polítiques y de revisión de la historia.
Xabiero Cayarga (Cangues d’Onís, 1967) ye ún de los escritores más reconocíos de la lliteratura asturiana d’anguaño. Narrador y poeta tien publicaos dellos volúmenes de cuentos (Les gatileres del cielu, Güelgues sobre’l llagu, A flor de piel) y la novela Trastes de bufarda. Ganador de los premios «Teodoro Cuesta» y «Xuan María Acebal», ye autor de los poemarios El deliriu d’esclavu, Pequeña Europa, Les llingües de la Hidra y La ñeve del cuquiellu (en preparación).

El Norte. Cuentos 1976-2010

Vicente García Oliva
Clásicos y contemporanios, 14
ISBN: 978-84-8053-612-7
12,5 x 19 cm
|| 260 páxs. || PVP: 7 €

El Norte, que rescata’l títulu del volume que Vicente García Oliva (Xixón, 1944) publicara en 1991 cola editorial Llibros del Pexe, recueye los cuentos escritos ente 1975 y 2010. Son más de 40 les pieces aquí reuníes que, al pesar del pasu del tiempu, de los cambeos qu’esti arrecostina, mesmo no social que no llingüístico y personal, y de la diversidá temática y d’estilu que presenten, caltienen la frescura d’entós y un filu que les xune: son histories que nacen del contactu ente lo fantástico y lo cotidiano.

El cuartu negociu

Ismael Mª González Arias
Clásicos y contemporanios, 13
ISBN: 978-84-8053-611-x
12,5 x 19 cm
|| 158 páxs. || PVP: 6 €

El cuartu negociu –primer novela d’Ismael María González Arias (Uviéu, 1958)– ganó’l Premiu Xosefa Xovellanos del 1992. Con ironía bien fina y un puntu de cinismu, l’autor va narrando’l pasu de Fernando Martín, de la P&C Ld., peles tierres desolaes de l’antigua Yugoslavia. Cuerren los primeros años 90 del sieglu xx y Bosnia ye sinónimu de guerra, muerte, traición y... negocios d’armes al traviés d’una empresa y unos personaxes que nun tienen escrúpulos nin torga. Coetania de los socesos que narra, esta obra introduxo na narrativa asturiana d’entós la novela d’acción, que, al par qu’entretién, fai pensar y nunca nun dexa indiferente.