lunes, 30 de agosto de 2010

Premiu Montesín de Lliteratura Xuvenil 2010

El plazu pa la presentación d'orixinales pal PREMIU MONTESÍN DE LLITERATURA XUVENIL 2010 acaba'l día 13 de setiembre a les 24:00 h.

miércoles, 4 de agosto de 2010

La bufanda

Premiu Narraciones Trabe 2009
David Artime Coto
ISBN: 978-84-8053-561-8
13 x 20 cm
|| 344 páxs. || PVP: 12,50 €

Con esta novela David Artime Coto inaugura la so trayectoria como novelista. Y failo ganando la edición 2009 del Premiu de Narraciones Trabe con una historia que, con humor, ironía, dramatismu y crítica, adiéntrase nun tema virxe dafechu na lliteratura en llingua asturiana y, pal casu, tamién nel restu de llingües del Estáu: el de los ultras de los equipos de fútbol.
La bufanda cuenta les complicaes situaciones nes que se ve involucráu, bien por voluntá propia, bien por aición de les circunstancies, un ultra del Sporting de Xixón, demientres l’últimu tramu d’una lliga na que’l club llucha por evitar el descensu. Con un llinguaxe modernu y frescu, lliterariu y cuidáu, l’autor va filando una mecigaya de sentimientos enfrentaos, dende los más nobles y altos valores hasta los instintos más baxos, que conviven na mente de los auténticos hinches.
La socesión d’episodios dirá complicando cada vez más la vida del protagonista hasta obligalu a reflexonar sobre la realidá del mundu nel que ta metíu y el papel que nél xueguen la violencia, la política, la valentía, el compañerismu, la hipocresía social y los intereses económicos y mediáticos d’un deporte vueltu descomanáu negociu capitalista, nel que los ultras son cuando la so cara más digna cuando la más escura.
David Artime Coto (Candás, Carreño, 1979) estudió Ciencies de la Información y trabaya como periodista. Ganador de dellos premios lliterarios, ye responsable d’una adaptación teatral de la novela José, de Palacio Valdés.

Tu como yo. El nacionalismu vistu d'otra manera

Inaciu Iglesias
ISBN: 978-84-8053-555-7
14 x 21,5 cm
|| 64 páxs. || PVP: 8 €

¿Qué significa’l nacionalismu? ¿Sangre y tierra? Pues en cierta manera, sí. Pero con matices. Porque si envede sangre y tierra, que suena mui tremendo, falamos de ciudadanía por herencia o derechos de residencia por vecindá, la cosa suena infinitamente más moderna y tolerante. Pero ye eso, exactamente eso, lo que significa’l nacionalismu: el respetu a los nuestros antepasaos y la complicidá colos nuestros vecinos. En definitiva, alcordanza y convivencia. O, dicho d’otra manera, sangre y tierra.
Inaciu Iglesias (Uviéu, 1966), empresariu, articulista y editor, tien publicaos dellos llibros recopilatorios d’artículos periodísticos (Soi empresariu, confiésolo –2008–; Independencia –2006–, Dar la cara –2001–) y d’ensayu (Historia del nacionalismu asturianu –2004–, La identidá asturiana –1993–).