viernes, 4 de junio de 2010

El cultivu del maíz nel Conceyu de Xixón

Beatriz Rato Rionda
14 x 21,5 cm
240 páxs.

Los conquistadores españoles conocieron el maíz de la que llegaron al Nuevu Mundu y, mesmo que lo fixeron con otros productos, traxéronlu pa les tierres peninsulares. P’Asturies llega de la mano de Gonzalo Méndez de Cancio nel sieglu xvi: dase por bona la primer collecha d’esta planta gramínea en 1605 peles tierres occidentales de Castripol y Tapia.
Esti volume recueye la historia del maíz nel Conceyu de Xixón: dende les maneres de sema y recoyida hasta les manifestaciones culturales, etnográfiques y elementos folclóricos qu’al rodiu d’ello surden y que se caltienen cásique inamovibles hasta la segunda metada del sieglu xx, en que la industrialización fae que’l so cultivu desapaeza.
El llibru complétase con una riestra d’entre-vistes a persones d’edá pertenecientes a toles parroquies del conceyu sobre’l cómo y el porqué de les esfoyaces y filandones, que, col maíz como centru, se desarrollaben na Asturies rural.
Beatriz Rato Rionda ye llicenciada en Filoloxía Hispánica (especialidá de Llingua) pola Universidá d’Uviéu. Siempre averada al mundu de la cultura tradicional asturiana, tien yá publicaes delles obres: Vida cotidiana urbana n’Asturies (1900-1950) –vtp, 2001– y los llibros xuveniles Aventures d’un bolígrafu (vtp, 2003), Xugando al esconderite (vtp, 2003), Apuros na playa (vtp, 2003) y Torimaki (vtp, 2004).

Tiempu de render

Premiu «Nené Losada Rico» 2009
Sofía Castañón

14 x 21 cm
80 páxs.

Nun ye precisamente función de la mocedá’l tener cuentes pendientes col tiempu, sicasí con ventitantos, eso que llamamos memoria ye daqué qu’igual nun somos a escribir con mayúscules, pero que sabemos que descansa soterrada. Nesta sensación de tresformación estraña que llevanta l’aire ente lo que llamemos nueso, les manes puerques de tierra y agua suponen un arma pa la permanencia.
Estes son les manes, dondes, blanques, de Sofía Castañón qu’aguanten l’aire contra’l tiempu. Estes les pallabres en minúscula, les güelgues del animal que resiste y da cuenta de que permanecemos anque tire l’aire, que daqué atropamos ente la peñera de los deos, un tiempu, una cadarma, un raigañu que val d’estructura. Y ye precisamente tierra y agua la conclusión del trabayu, la paga del que renderiza’l tiempu pa enseñamos la so forma, precisa o non, desde la qu’edificar la Memoria.
Tiempu de render ye la primer entrega n’asturianu d’una autora atenta y activa que yá mos dexara en castellanu poesía llimpio y rápido, versos como ríu que vuelven, nesti llibru, a alcordase de la fonte, a mirar dende fuera, a volver a volver y volver a marchar y llevar cada vuelta menos equipaxe y más esperiencia.
Rubén d’Areñes