martes, 22 de diciembre de 2009

Estoyu 01

Ediciones Trabe saca'l númberu 1 d'Estoyu. Revista de Llibros, dedicada nesta ocasión al llibru infantil y xuvenil.
Fecha col enfotu de dar a conocer los llibros editaos n'Asturies, en cualquiera de les sos llingües, va disdribuíse de baldre per llibreríes, biblioteques, escueles, IES... Amás, pue atopase en formatu PDF na web y nel blogue d'Ediciones Trabe.

Descargar Estoyu 01

sábado, 19 de diciembre de 2009

Premiu de Narraciones Trabe 2009

El periodista candansín David Artime, cola novela La bufanda, ye'l ganador del Premiu de Narraciones Trabe 2009, falláu'l vienres a la tarde.
El xuráu, formáu por Xuan Bello, Antón García, María Antonia Pedregal, baxo la presidencia d'Esther Prieto y actuando como secretariu Inaciu Iglesias, destacó el bon facer narrativu del autor, amás de la novedá y actualidá de la so temática.

martes, 15 de diciembre de 2009

Harry Potter :: Primer capítulu de baldre


Baxa de baldre'l capítulu primeru del númberu ún de la serie Harry Potter, vertíu al asturianu, Harry Potter y la piedra filosofal.
Si te prestó, pues mercar el llibru completu na to llibrería o na web d'Ediciones Trabe: www.trabe.org

Harry Potter y la piedra filosofal


J. K. Rowling. Versión n'asturianu de Xesús González Rato
12,5 x 22 cm
264 páxs.

Harry Potter ye un rapaz güérfanu que vive colos tíos nun barriu tranquilu. Pero un día vien por él un xigante de pelo prieto y enguedellao y cuénta-y que ¡ye un magu! Dende entós, va cursar los estudios nel Colexu Hogwarts de Maxa y Bruxería. Nesta escuela pa magos va conocer unos amigos insepartables anque tamién va ganar unos enemigos llercibles. Va treslladanos a un mundu fantásticu nel que Harry habrá xugar al quiddtich, va tener que s’enfrentar a un perru de tres cabeces, va convivir con bisarmes, centauros, dragones y munches otres criatures máxiques. Va tar obligáu a adentrase na Viesca Vetada, y lo peor de too, va tener que s’encariar col más grande de los magos escuros, somorguiándose nuna historia apasionante que tien como meta única la Piedra Filosofal, un oxetu que, al paecer, más d’ún nagua por poseyer.
Harry Potter y la piedra filosofal ye la primera d’una serie de siete noveles trepidantes y enllenes d’aventures escrites por J. K. Rowling, la gran sorpresa de la lliteratura infantil y xuvenil del momentu. Con una prosa fluyida anque plagada de detalles, acapara l’atención de quien llee dende la primer páxina hasta la última, y permíte-y esfrutar d’un universu máxicu qu’a toos nos prestaría vivir.